Félagslífið

Í Menntaskólanum í Reykjavík starfa tvö nemendafélög; Skólafélagið og Framtíðin. Einnig eru margar nefndir og félög starfandi, t.d. myndbandsnefnd, leiknefnd, listafélag, skemmtinefnd, tónlistarnefnd, íþróttaráð, skákfélag o.fl.

Félagslífið í skólanum er mjög öflugt og allir sem hafa áhuga á félagsstörfum fá tækfæri til að leggja sitt af mörkum, t.d. með því að bjóða sig fram í embætti innan nemendafélaganna, sitja í bekkjarráðum eða sækja um í árshátíðar- og markaðsnefndir.

Bæði nemendafélögin standa fyrir mikilli útgáfustarfsemi. Þar ber helst að nefna Skinfaxa, elsta skólablað landsins, og Skólablaðið. Þessi rit eru bæði mjög vegleg og eiguleg en í þeim er fjallað um flest það sem gerðist í félagslífinu á skólaárinu. Einnig koma ritin Menntaskólatíðindi og Loki Laufeyjarson út reglulega yfir veturinn og Vísindafélagið gefur De Rerum Natura út í lok vetrar.

Í MR er lagður mikill metnaður í keppnirnar Morfís og Gettu betur. MR hefur unnið Gettu betur 13 sinnum, oftast allra skóla, en aðeins einn skóli hefur oftar unnið Morfís. Það myndast jafnan mikil stemmning í skólanum í kringum keppnirnar. Framtíðin stendur fyrir sams konar keppnum þar sem keppt er um hvaða bekkur hefur að bera mesta vitneskju og mælskulist.

Á hverju ári fer fram söngkeppni milli nemenda en sigurvegari hennar verður fulltrúi MR í Söngkeppni Framhaldsskólanna.