Námið

Námið í MR skiptist niður í námsleiðir á náttúrufræðisviðum og málasviðum. Til að byrja með velja nemendur annaðhvort náttúrufræði- eða málabraut en tveimur árum síðar stendur val um fjórar mismunandi deildir til boða.

Náttúrufræðibrautin skipitst niður í: Náttúrufræðibraut I, Náttúrufræðibraut II, Eðlisfræðibraut I og Eðlisfræðibraut II en málabrautin skiptist niður í: Fornmálabraut I, Fornmálabraut II, Nýmálabraut I og Nýmálabraut II.

Munurinn á I og II deildum er sá að í II deildum er gert ráð fyrir 6-9 valeiningum en á I deildum fara þessar einingar inn í aðalfögin. II deildirnar henta því vel þeim sem hafa ekki ákveðið í hvaða nám þeir ætla að loknu stúdentsprófi.

Valgreinarnar sem eru í boði á II deildum eru: bókmenntir, félagsfræði þróunarlanda, hagfræði, hebreska, japanska, kvikmyndafræði, listasaga, lögfræði, myndlist, rússneska, stjórnmálafræði, viðskiptafræði o.fl. Listnám utan skólans getur verið metið í stað valgreina.

Í Menntaskólanum í Reykjavík er bekkjakerfi og hver bekkur hefur oftast sína heimastofu. Þetta gerir það að verkum að góður bekkjarandi myndast og bekkjarfélagarnir tengjast vináttuböndum sem haldast alla ævi.